Habilitation

D Habilitazioon isch die höggsti Hochschuelbrüefig in de mäiste westöiropääische und e baar ostöiropääische Länder, wo mit ere im Raame vom ene akadeemische Brüefigsverfaare d Leerbefääigung (latiinisch facultas docendi) im ene wüsseschaftlige Fach festgstellt wird. Im angelsäggsische Hochschuelsüsteem git s nüt Vergliichbars.

D Anerkennig vo dr Leerbefääigung bildet d Vorussetzig für d Leerberächdigung, latiinisch venia legendi («Erlaubnis vorzlääse» d. h. Vorlääsige z halte) genannt wird. Im Underschiid zur Leerbefääigung isch si vilmol bunde an reegelmäässigi Leerverpflichdige (Diddelleer). Mit dr Habilitazioon söll brüeft wärde, öb dr Wüsseschaftler si Fach in siner volle Bräiti in dr Forschig und dr Leer cha verdräte.

Es git Uniwersidääte wo mä mit dr Habiltazioon nume die akadeemischi Bezäichnig Brivaatdozänt (PD oder Priv.-Doz.) bechunnt. An e Hufe Fakultääte bechunnt mä au no dr akadeemisch Graad vom ene habilitierte Dokter (Doctor habilitatus, churz: Dr. habil.), wo mä au bhaltet wenn mä nüme Underricht git.